Претседателот на државата, Ѓорѓе Иванов, летните одмори ги поминува во Охрид, а претседателот на парламентот, Трајко Вељаноски се сонча на албанската ривиера.
Вељановски во Албанија ќе помине седум дена, а албанските медиуми вчера соопштија дека на истото одмаралиште е и претседателот на ДПА, Мендух Тачи.
Иванов, пак, во резиденцијата во Охрид ќе помине неодредено време затоа што од таму ги извршува и службените обврски, односно присуствува на бројните манифестации кои се одвиваат овој период.
– Кога претседателот е во Охрид, добар дел од обврските ги извршува од таму. Овој период има доста манифестации во Охрид, како Охридско лето и Струшки вечери на поезијата, така што дел одмара, а дел од времето го поминува службено – велат од кабинетот на претседателот.
Вељановски се капе на плажата Јале која е една од најубавите плажи во Албанија и ја сметаат за недопрениот рај на Европа. Се наоѓа во Влора, околу 55 километри јужно од градот, непосредно пред селото Химаре.