Џихадистичката група Исламска држава (ИД) денеска објави аудио запис, во кој, како што се тврди, говори бомбашот-самоубиец кој го изврши нападот во џамијата во Саудиска Арабија во четвртокот, при што загинаа 15 припадници на саудиските безбедносни сили.
Аудио снимката, заедно со фотографија на наводниот напаѓач, кој е идентификуван како Абу Синан ал Наџди, е објавена на еден налог на Твитер поврзан со ИД.
Наводниот Наџди на снимката вели дека Саудиска Арабија ќе се соочи со уште напади, додавајќи дека „саудиските владетелите и војници нема да уживаат во мирот“, затоа што учествуваат во коалицијата предводена од САД што врши напади врз припадниците на ИД во Сирија и Ирак.
Во снимката осомничениот бомбаш-самоубиец упатува и апел до други милитанти да извршуваат самоубиствени напади, нагласувајќи дека „појасите со експлозив се многу по ефективни од огненото оружје“.