Претседателот на ДУИ Али Ахмети и амбасадорот на Словенија Бранко Раковец на средбата во Тетово разговарале околу напорите за решавање на политичката криза во земјата, безбедносната ситуација, прашањето за името и евроатлантските интеграции.
Ахмети, како што стои во партиското соопштение, ја истакнал важноста на постигнувањето политички договор меѓу лидерите на четирите најголеми партии во земјата со посредство на комесарот Хан и амбасадорите на САД и ЕУ во Скопје.
Ахмети изразил уверување дека сите страни ќе бидат конструктивни и ќе вложат напори за да се постигне компромисен договор кој го поддржуваат сите заедно.
Постигнатиот договор, како што истакнал лидерот на ДУИ, овозможува решавање на проблемите, но и враќањето на приоритетната агенда на Македонија, и тоа интегрирањето во НАТО и ЕУ преку остварување на решенија за прашања со нашите соседи и одржување на здрави меѓуетнички односи.
Во врска со безбедносната ситуација по настаните во Куманово, Ахмети ја посочил потребата од блиска регионална соработка особено меѓу дирекциите за безбедност на Косово и Македонија со цел, како што стои во соопштението, да се испита овој случај и вистината да излезе пред јавноста.