Уште два нови случаи на туларемија на подрачјето на општина Арачиново се лабораториски потврдени. Со тоа вкупниот број заболени на тоа подрачје изнесува 12. Поради зголемениот број случаи во последните три месеци, Центарот за јавно здравје – Скопје вчера на тоа подрачје прогласи локална епидемија.
Билјана Даниловска од Центарот за јавно здравје – Скопје денеска изјави дека од 12-мината заболени, шест се од село Грушино, а шест од село Арачиново.
– Сите пријавени заболени лица од страна на епидемиолошка екипа од Центарот за јавно здравје се анкетирани. Заболените се на возраст од 11 до 73 години. Најголем процент (42 отсто) од заболените односно пет заболени се на возраст од 20 до 29 години, истакна Даниловска.
Со 12-те случаи на подрачјето на општина Арачиново, вкупниот број заболени од туларемија во Македонија изнесува 31.
