Во Кичево денеска беше одбележан 8 Април – Меѓународниот ден на Ромите.
– Образованието е најзначајниот дел од една нација, затоа би апелирале до сите Роми да посветуваат поголемо внимание на образованието за да не бидеме никогаш покорени, изјави на манифестацијата теологот Нуран Сулејманоски.
За историјата на ромската заедница зборуваше етнологот д-р Трајко Петроски кој истакна дека 8 Април, како меѓународен ден на Ромите е прифатен на конгресот во Лондон каде што се собрале највлијателните интелектуалци Роми.
Во продолжение на овој народен собир беа презентирани народните носии на Ромите, се пееја ромски песни и ора и на крај присутните имаа можност да ја проследат изложбата на стари фотографии на кои се покажува животниот пат на Ромите во Кичево.
Одбележувањето беше во организацијата на НВО „Природба“ со поддршка на градоначалникот на Кичево.