Претседателот на Индонезија, Видодо изјави дека над 11-те затвореници, кои што се осудени претежно поради шверц на дрога, ќе биде извршена смртна казна и дека таа нема да биде одложена, но и ги предупреди другите држави да не се мешаат во правото на официјална Џакарта да ја спроведува смртната казна.
Како што пренесе „Ројтерс“, Видодо одбил да ги помилува осудениците, наспроти барањата на власите на Австралија, Бразил и Франција, чии што државјани се некои од оние кои наскоро би требало да бидат погубени.
-Прво што сакам да кажам е дека никој не треба да се меша во нашето право на извршување на смртна казна, затоа што наше суверено право е да ги спроведуваме законите- рече тој.
Индонезиските закони предвидуваат строги казни за шверц на дрога, а државата по петгодишна пауза повторно започна да ја спроведува смртната казна.
Официјална Канбера спроведе одлучна кампања за спас на животите на своите државјани Мјуран Сукумаран (33) и Ендрју Чен (31), кои во 2005 година се прогласени за виновни за организирање на шверц на хероин од Индонезија.
Австралиските власти кои веќе подолго време не се во најдобри односи со својот северен сосед Индонезија, соопштија дека ќе ја разгледаат можноста за повлекување на својот амбасадор од Џакарта доколку егзекуцијата биде извршена.
Бразил и Холандија веќе ги повлекоа своите амбасадори откако индонезиските власти минатиот месец погубија нивни државјани поради шверц со дрога.
Е. Г.