Времето во Македонија утрово е сончево и студено, на повисоките места со слаб ветер од променлив правец, по одделни котлини со утринска слаба магла.
Според УХМР, во 7 часот се измерени минусни температури, најниска од – 9 во Маврово, -7 во Берово, -6 во Лазарополе, -5 во Скопје (Петровец) и во Крива Паланка, -4 во Куманово, Битола, Тетово, Крушево и Претор, -3 во Скопје (Зајчев Рид) Демир Капија, Гевгелија, Прилеп, Дебар и во Струмица, -2 во Кавадарци и Охрид, -1 во Штип и Виница и 0 степени во Дојран.
Во седум часот во Маврови Анови е измерена снежна покривка од 49 сантиметри, 35 см во Лазарополе и 22 во Крушево.
УХМР за денес најави претежно сончево со слаба утринска магла по некои котлини. Ќе дува слаб ветер од источен правец. Максималната температура ќе биде во интервал од 10 до 13 степени.
Во Скопје сончево со слаб источен ветер и со дневна температура до 11 степени.
Утре поради спуштање на постуден воздух од север ќе има преодно зголемување на облачноста проследено со умерен северен ветер и опаѓање на дневната температура. Во југоисточните делови ќе има услови за локален слаб дожд, а на планините слаб снег. Од среда повторно ќе продолжи периодот на стабилно и суво време со постепен пораст на дневната температура.