Јорданскиот крал Абдула Втори денеска го оцени како неодговорно однесувањето на францускиот сатиричен неделник „Шарли ебдо“, кој во средата објави нови карикатури на пророкот Мухамед.
„Тоа е непристојно и неодговорно однесување. Основните принципи на слободата на изразување се одговорноста и почитување на религиите, а не свесни напади“, се наведува во соопштение на јорданскиот крал.
Во соопштението на јорданскиот крал се нагласува неопходноста од манифестирање на мудрост, дух на дијалог и отвореност, да се работи конструктивно за одбрана на меѓусебното почитување, сочувство и заеднички вредности.
Абдула Втори и неговата сопруга Ранија учествуваа заедно со 50 државни и владини раководители во историскиот марш, организиран во неделата во Париз по џихадистичките напади, во кои загинаа 17 лица.