Покрај постојната Музејска збирка, Средновековните кули и Етно куќата, Кочани од наредната година ќе добие Музеј за оризот, во кој ќе бидат сместени сите артефакти од одгледувањето, производството и преработката на оваа земјоделска култура, која во кочанскиот крај е присутна повеќе векови.
– Иницијативата произлезе од вработените во Институтот за ориз во Кочани, установа која осумдесетина години се занимава со семепроизводство и заштита на сортите ориз кои низ годините се произведувале во Кочанскиот крај и Македонија, вели Добре Андов, директор на оваа научна установа.
За потребите на музејот, Андов истакнува дека е определена и една од постојните згради во кругот на Институтот, градена во 1927 година кога е формирана и Реонската опитна станица за ориз.
За реализација на Музејот, општина Кочани во рамките на програмата за локален економски развој за наредната 2015 година планира средства во износ од 8 милиони и 300 денари.