На вчерашната трибина на СДСМ и коалициските партнери со граѓаните на Тетово се обрати генералниот секретар на СДСМ, Оливер Спасовски кој рече дека конзистентноста и солидарноста која произлегува од редовите на СДСМ е гарант за разбирање и солидарност со проблемите со кои се соочуваат граѓаните во Република Македонија.
Спасовски порача дека истрајноста на СДСМ, заедно со граѓаните, ќе ги донесе неопходните промени во Македонија.
На трибината, граѓаните отворија голема дебата на која бараа решенија за проблемот со високите цени за водата, струјата и парното, големиот проблем на тетовчани со загадувањето на воздухот, прашуваа како да се справат со притисоците кои се вршат врз наставниците, дали власта намерно ги предизвикува меѓуетничките односи и сл.
Ова беа дел од прашањата за кои се интересираа присутните на големата трибина од широката граѓанска дебата што ја отворија СДСМ и коалициските партнери, вчеравечер во Тетово.
