Лактариумот на Универзитетската клиника за гинекологија и акушерство, што функционира од почетокот на август годинава, досега го посетиле 53 мајки, а експресираното мајчино млеко е вклучено во исхраната на 61 новородено дете, меѓу кои и 8 пара близнаци, соопшти денеска Министерството за здравство.
Лактариумот е наменет за мајките-родилки кои веќе го напуштиле родилиштето, а чии новородени деца се третираат на одделението за интензивна неонатална нега и терапија.
Во лактариумот, мајката-родилка прави експресија (измолзување) на млекото, а потоа експресираното мајчино млеко е вклучено во исхраната на новороденото дете. Лактариумот е организиран согласно Водичот за експресија и употреба на мајчино млеко. За експресија на мајчиното млеко се употребуваат рачни пумпи за еднократна употреба, кои ги обезбедува Клиниката.
Според Министерството за здравство, функционирањето на лактариумот овозможува унапредување на грижата за ранливите категории новороденчиња и придонесува кон подигнување на свеста за значењето на мајчиното млеко. Мајчиното млеко, посочува ресорното Министерство, е многу значајно за подобрување и зајакнување на имунитетот кај ранливите групи новороденчиња, особено предвремено родените деца, новороденчињата со мала родилна тежина, или болните новородени деца.
– Исхраната со мајчино млеко овозможува и други придобивки, како што се: унапредување на севкупниот развој на новороденчето (физички, моторен, социо-емоционален и когнитивен развој), намалување на ризикот од хронични и автоимуни болести (алергија, aстма, дијабет и разни инфекции) во периодот на детството, како и намалување на можноста за понатамошна појава на хронични незаразни заболувања. Воедно, на овој начин се постигнува значаен психолошки ефект на зајакнување на емотивната врска помеѓу мајката и новороденчето, се вели во соопштението од Министерството за здравство.