Последниве четири дена на преглед и контрола согласно упатствата и препораките на Комисијата за заразни болести се јавиле 66 патници, кои изминативе денови престојувале на аџилак во Саудиска Арабија, соопшти Центарот за јавно здравје од Куманово.
Прегледаните, според Јадранка Стаменковска епидемиолог во центарот за јавно здравје, се во добра здравствена состојба.
– Здравствените тимови спроведуваат конторла на повратниците. Прво им се врши епидемиолошка анкета, се зема крв за утврдување на маларија, се мери температура, се проверува дали имаат симптоми на заразните болести, ебола, колера, како и на респираторниот вирус МЕРС, изјави Стаменковска.
Овие патници, пред заминувањето во Саудиска Арабија примиле вакцина против менингит, а им била дадена и антималарична хемиопрофилакса во просториите на Центарот за јавно здравје.
Според евиденцијата на кумановскиот Центар за јавно здравје се очекува на контрола и преглед да се јават уште 50 патници. Епидемиолозите од кумановскиот Центар за јавно здравје информираат дека ќе ја следат состојбата на патниците во наредните три недели.