Бројот на вработени во Европската унија и во Еврозоната се зголемил во вториот квартал на 2014 година, јавува дописникот на МИА од Брисел.
Според информациите на Европската канцеларија за статистика (Евростат), вработеноста во Еврозоната е зголемена за 0,2 проценти, додека во Унијата достигнала плус 0,3 отсто во вториот квартал на оваа година, а во споредба во првиот квартал.
Најголемо зголемување на вработеноста е забележано во Португалија од 0,9 отсто, Шпанија (0,7 отсто) и Унгарија (0,6 проценти), додека намалување на бројот на вработени од еден процент е забележан во Литванија, а намалување има и во Кипар од 0,1 отсто.
Според Евростат, овие бројки се сезонски прилагодени и во споредба со истиот квартал од претходната година, вработувањето се зголемило за 0,4 проценти во еврозоната и за 0,7 отсто во 28-те земји-членки на Европската унија. Според Европската канцеларија за статистика, проценките се дека во вториот квартал на 2014 година, 224,9 милиони мажи и жени биле вработени во ЕУ, од кои 146.5милиони во Еврозоната.