Министерот за информатичко општество и администрација Иво Ивановски денеска, во рамки на 9. Форум за интернет владеење во Истанбул, Турција, организира прием и свечен работен ручек по повод промоцијата на кандидатурата на Република Македонија за член во Советот на Меѓународната телекомуникациска унија.
Настанот се одржа во хотелот Риц-Карлтон во Истанбул под покровителство на Акан Сувер, претседател на Мармара груп фондацијата и пријател на Република Македонија, и во соработка со Генералниот конзулат на Република Македонија во Истанбул.
На приемот присуствуваа Хулин Жао, заменик-генерален секретар на Меѓународната телекомуникациска унија, Вујица Лазовиќ, вицепремиер во Владата на Црна гора, Гизела Копер, министер за информатички технологии на Коста Рика, заменик министерот за комуникации и информатички технологии на Република Азербејџан Елмир Велизаде, Меган Ричардс, челник на Делегацијата на Европската комисија во ИГФ, високи претставници од САД, директори на национални регулатори во областа на телекомуникациите и други еминентни гости.
Настанот особено го збогати учеството на Винт Церф, иноваторот на Интернетот кој изрази поддршка на кандидатурата на Република Македонија за член на Советот на Меѓународната телекомуникациска унија.