Иран сигурно ќе постигне успех во преговорите со „шесторката“ меѓународни посредници за надминување на иранскиот нуклеарен проблем (петте постојани членки на Советот за безбедност на ОН плус Германија) изјави денеска министерот за надворешни работи на Исламската република Мохамад Џавад Зариф, пренесе ИТАР-ТАСС.
Зариф во Москва разговараше со својот руски колега Сергеј Лавров.
-Ние разбираме и знаеме дека Русија ни помага и каква позиција зазема за време на преговорите, одбележа тој.
Иранскиот државник изрази благодарност „за позитивната позиција на руската Влада во преговорите меѓу Иран и „шесторката“ и надеж дека во блиска иднина ќе може да се постигнат позитивни резултати, благодарение токму на руската позиција“.
Според Лавров, Русија полага напори преговорите за иранската нуклеарна програма да минуваат во праведни рамки и никој учесник да не добива еднострана предност, иако има такви обиди.
Русија се изјасни за решение, изградено врз почитување на правото на Иран да извршува мирновременска нуклеарна активност „вклучувајќи го и правото на збогатување ураниум“, посочи тој.