Регистрирани нови 26 случаи на ХИВ и СИДА во Македонија во првите седум месеци од годината. Од нив десет лица се заболени со СИДА, 16 се ХИВ позитивни, а регистрирани се и два смртни исходи од СИДА.
Ова денеска на прес-конференција го кажа началникот на одделението за ХИВ/СИДА Жарко Караџовски каде нагласи дека трансмисијата на ХИВ во 18 случаеви е преку контакт на машко со машко лице, кај шест лица е преку хетеросексуален начин, а кај две е непознат начинот на трансмисија.
– Структурата по пол на лицата со ХИВ и СИДА во 2014 година е 25 машки и едно женско лице. Едно лице е под 19 години, 12 лица се од 20 до 29 години, десет лица се од 30 до 39 години, две лица се од 40 до 49 години и едно лице е над 60 години, истакна Караџовски.
Додаде дека СИДА-та во светски рамки според бројот на заболени помеѓу машки и женски лица изнесува 50 наспроти 50 проценти, а во Македонија е 95 отсто машки наспроти 5 проценти од женски пол.
– Градот Скопје има 16 случаи на ХИВ и СИДА што изнесува 62 проценти од сите случаи регистрирани во 2014 година. Куманово има три случаи од кои два се ХИВ позитивни и еден болен, Свети Николе два, Тетово еден, Струмица еден, Кочани два и Штип еден, појасни Караџовски.
Нагласи дека првпат до сега нема случај на пренесување на ХИВ вирусот кај лица кои што инјектираат дрога, а во период од три години не е забележан и случај на трансмисија од мајка на плод.
Во периодот од 1987 до 2014 година се регистрирани вкупно 223 лица кои живеат со ХИВ и СИДА. Од нив 177 лица се од машки пол, а 46 лица се женски. Во 2013 година изработени се 24.562 теста за дијагностика на ХИВ.