Лекари контра лекари, невладини против невладини, едни протестираат за нешто што било пред 6 години, а како што тргнале за ова што е денеска, ќе им текне да се побунат после 5 години.
И сите нормално чисти, што би рекле „ѓоа бебенце“, а политички вмешани-скраја да е.
Ало…Има ли пилот во авионот „Македонија“, или го вози кој стигне, според дневна желба и потреба?
Понеделникот се вознемиривме, ДУИ е скар со ВМРО-ДПМНЕ и не си играат веќе со нив, па од нивната кавга, курбан отиде желбата за пензија на заменикот на Народниот правобранител. Жената уредно си исполнила услови и сака да ужива во пензионерските денови.
Е ама каде најде во овие „тревожни моменти“ да го посака ова. Прво требаше да види каква е атмосферата, цвета ли љубовта или тендерите се закочени, па после да си бара дозвола од пратениците.
Јасно, на ти го-дај ми го тактиката беше два -три дена, и повторно се беше како пред…па како пред Слупчане.
Нервозите, по некоја псовка, се заборавија.
Она што треба да го патентираме како наш изум, сега не може Милошевиќ да не тужи за плагијат за изумот, секој ден да никнуваат нови и нови таканаречени невладини, па по потреба и лекарски синдикати.
Фрчковски си доби француски клуч и им ја покажа вратата, а таа што држеше говор како историчар за заштита на спомениците, само во слободно време го правела тоа, а во останатото, била ептен непартиска личност.
И после да не се чудиме од каде и е на Брисел оценката за недоволен демократски капацитет.
Катерина Цаневска Арсовска