Палестинци кои живеат во Грција, членови на синдикати, политички партии и организации за човекови права синоќа одржаа протест пред израелската Амбасада во Атина, против бомбардирањето на Појасот Газа.
Како што јави дописникот на МИА од Атина, повикот за протест го упати опозициската партија Сириза која истакна дека „повеќето од жртвите на израелското бомбардирање се цивили, меѓу кои и многу деца“ и го обвини Израел дека е „охрабрен од толеранцијата на меѓународната заедница“.
Собирот на Сириза се совпадна со протестот и маршот што го организираше и Комунистичката партија на Грција (ККЕ).
– Грчката Влада мора веднаш да ги откаже сите договори со Израел, воени и секакви други, изјави генералниот секретар на ККЕ, Димитрис Куцумбас.
Амбасадор на палестинските власти во Атина Марван Емил Тубаси, кој исто така учествуваше во маршот, му се заблагодари на Куцумбас и ККЕ за, како што рече, „доследните позиции во поддршката на националната борба на палестинскиот народ против варварската окупација од страна на Израел, против варварската операција против Палестинците во Газа, како и против политиката на Израел за изгрдаба на населби“.