Италијанската министерка за надворешни работи, Федерика Могерини, синоќа објави во Рим дека за време на актуелното италијанско претседателство со Европската унија ќе ги посети сите земји од Западен Балкан со цел да го придвижи напред процесот на проширување на Унијата, во согласност со напредокот на земјите кои се стремат кон членство, јави дописникот на МИА од Брисел.
-За време на италијанското претседателство, заедно со комесарот за проширување Штефан Филе, ќе ги посетам сите земји од Западен Балкан со цел да се види што може да се направи во процесот на проширување. Нема причина реформите во овие земји да не се признаат и наградаат, рече Могерини пред група дописници од Брисел кои се повикани во италијанската престолнина по повод преземањето на Италија на ротирачкото претседателство со Советот на ЕУ.
Могерини, која се споменува како најверојатен наследник на Кетрин Ештон на чело на Европската дипломатска служба (ЕЕАС), додаде дека земјите од регионот се на различен степен во однос на европската интеграција, но дека преземаат чекори во вистинската насока и затоа, според неа, истите треба да бидат охрабрени да продолжат со реформите.
-Верувам дека нешто конкретно може да се постигне во процесот на приближување на овие земји кон Европската унија, заклучи Могерини.