Размена на искуства за државната администрација и можностите за соработка, беа тема на денешната средба во Подгорица на државниот секретар во македонското Министерство за информатичко општество и администрација, Јахи Јахија, со државниот секретар при Министерството за внатрешни работи на Црна Гора, Јадранка Војновиќ и генералниот директор на Директоратот за администрација и локална самоуправа, Веселин Вукчевиќ.
Според соопштението од МИОА, на средбата е оценето дека унапредувањето на регионалната соработка и јакнењето на административните капацитети претставуваат основа за овозможување поквалитетен живот на граѓаните, паралелно и за напредок на обете земји. Остварувањето на тие цели ќе придонесе за поефикасна и потранспарентна администрација, што меѓу другото е приоритет во процесот за пристапувањето кон Европската Унија.
– Препознавајќи го значењето на Регионална школа за јавна администрација (Респа), со седиште во Даниловград, Црна Гора, беше разговарано за можни обуки, конференции и воспоставување мрежа за соработка помеѓу вработените во државната администрација и во институциите од областа на европските интеграции, кои преку разни практики и меѓусебна размена на искуства, би придонеле кон резултати во спроведувањето реформите во јавната администрација во двете земји, се вели во соопштението.