Извршниот комитет на ВМРО-ДПМНЕ на својата вчерашна редовна седница заклучи дека барањето на СДСМ за техничка влада е целосно неприфатливо.
ВМРО-ДПМНЕ, стои во соопштението од таа партија, е отворена за дискусија за прашањата кои ги адресираат политичките партии во Република Македонија, а се во согласност со принципите и вредностите на ВМРО-ДПМНЕ и со европските стандарди.
ВМРО-ДПМНЕ, како што се наведува, е отворена да разговара за идеи кои се рационални и имаат реална основа да се сметаат за идеи кои би значеле подобрување на стандардите на живеење на граѓаните на Република Македонија и е отворена за разговор за идеи кои би значеле подобрување и забрзување на перспективите на Република Македонија за понатамошна евроатланска интеграција.
– Во тој контекст, ВМРО-ДПМНЕ потврдува и повторува дека е спремна да разговара на темите поврзани со имплементација на препораките на ОБСЕ во македонското изборно законодавство, околу потребните активности кои треба да ги превземат институциите за зајакнување на довербата кон избирачкиот список и е спремна да разговара за адресирање на прашањата за понатамошна регулација на медиумскатата сфера во Република Македонија согласно европските стандарди, се вели во соопштението.
