Продлабочување на соработката, работни договори и како да се пристапи кон изработка на определен проект, се темите на кои денеска дискутираат членовите на Македонската академија на науките и уметностите (МАНУ) и деканите на факултетите при Универзитетот „Св. Кирил и Методиј“ во Скопје, главно од природните науки.
На денешниот состанок, како што информира академикот и претседател на МАНУ Владо Камбовски, се поканети факултети, главно од природните науки, каде имаме заеднички проекти во делот на заштитата на животната средина и енергетиката.
Камбовски информира дека вовеле нова практика, во договор со универзитетите, да ги уредат односите со потпишување меморандуми за соработка.
– Пред две недели го потпишавме првиот Меморандум со државниот универзитет „Св. Кирил и Методиј“ во Скопје. До крајот на месецот ќе бидат потпишани меморандуми за соработка со другите државни и со приватните универзитети, кои имаат достигнато одредено ниво на развој на научно-истражувачката дејност, потенцира Камбовски.
Меморандумот, како што рече, е еден инструмент кој обврзува на координација во овие активности, усогласување на истражувачките програми, отвореност во вклучувањето на потребни кадри во изведување на проектите кои ги имаме во МАНУ, а се повеќе ги има и на универзитетите.
Според него, покрај проектите, важно е да расте помлада генерација на истражувачи и да се даде придонес во развојот на научно-истражувачката дејност кај нас.
Камбовски најави дека средби ќе бидат организирани и со единиците на другите државни и приватни универзитети.