Русија се надева дека САД ќе го искористат влијанието врз новоизбраниот украински претседател Петро Порошенко за прекин на насилствата и воената операција. Тоа го изјави вчера рускиот министер за надворешни работи Сергеј Лавров по средба со државниот секретар на САД Џон Кери.
Средбата се одржа во хотел во центарот на Париз во пресрет на церемониите по повод 70 години од сојузничката операција во Нормандија.
– Се надеваме дека влијанието на САД врз новоизбраниот претседател на Украина ќе биде искористено за прекин на насилствата и конфронтациите, истакна Лавров.
– Не се сомневаме дека нашите американски партнери може да влијаат врз Порошенко и тоа се потврдува со фактот дека првата посета тој не ја направи во Донбас, туку во Полска на средба со претседателот на САД, додаде Лавров.
Рускиот шеф на дипломатијата нагласи оти му укажал на Кери дека дел од акциите на САД и ЕУ не помагаат за создавање конструктивен дијалог.
– Напротив, тие создаваат кај некои активисти во Киев илузија дека се им е дозволено. Таков развој на настаните нема да предизвика ништо добро, потенцира Лавров.