ВМРО – ДПМНЕ го повикува Јавниот обвинител да се произнесе во најкус можен рок, а Гордана Јанкуловска повторно ќе му даде шанса на Шилегов и новите клевети да ги брани пред надлежниот суд, се подвлекува во реакцијата од ВМРО – ДПМНЕ на денешната прес-конференција на портпаролот на СДСМ Петре Шилегов.
СДСМ, се вели во реакцијата, се очајни и се обидуваат преку монтирани и лажирани документи, здружени со лице правосилно осудено за фалсификат и злоупотреби, со неважечки печат и измислен поттпис, како што стои, да создадат магла која ќе ја покријат нивната безидејност.
– Ние нема да дозволиме да влеземе во лошиот филм на СДСМ и нивната ниска политика на фалсификати и монтажи. Ако вака продолжат само уште повеќе ќе се дозаглават во калта во кои самите паднаа, се вели во реакцијата од ВМРО – ДПМНЕ.
На 27. април, се истакнува во реакцијата од ВМРО – ДПМНЕ, граѓаните го дадоа најдобриот одговор на политиките на лаги, манипулации и подметнувања кои, се посочува, се единствената понуда и во моментов единственото нешто од СДСМ.
– Јасно е дека СДСМ е во очај. Јасно е дека таму веќе не се знае кој кого и за што лаже. Тоа што не е јасно е до каде ќе продолжи да тоне бродот и до кога ќе продолжи неодговорното однесување и манипулациите пред целокупната јавност. За политиката на клевети и навреди која ја практикува портпаролот Петре Шилегов, својот одговор го даде и судот кој веќе го прогласи виновен за фабрикување на невистинити приказни, кои имаат цел единствено да нанесат штета, се вели во реакцијата од ВМРО – ДПМНЕ на денешната прес-конференција на портпаролот на СДСМ.
