Лидерот на ДУИ и носител на листата за пратеници во Шестата изборна единица Али Ахмети на вчерашниот митинг во Неготино, општина Врапчиште вети развој на економијата и подобри услови за живот, особено на младите.
Пред жителите од овој крај, Ахмети посочи дека посветуваат големо внимание да го остварат она што го ветиле.
– Од нас нема да слушате за голем патриотизам и жртвувања, туку ќе зборуваме за организирање на економијата, унапредување на земјоделството и инфраструктурата со цел граѓаните да добијат поголеми придобивки, намалени цени, подобрување на условите за инвестирање што во иднина ќе значи отворање на нови работни места за младите да ја гледаат својата иднина тука, а не да одат надвор од земјата. Најголем патриотизам е сега да се инвестира и просперира тука кадешто живееме, рече Ахмети.
На 13. април, додаде Ахмети, Албанците го кажаа својот глас „Не – за едностраниот претседател“.
– На 27. април ќе има двајца кандидати за претседател, но тие не се наши и Албанците немаат свој кандидат. Тогаш очекувам Албанците да ги повторат резултатите од пред две недели кога на своевиден референдум ја потврдија нашата одлука за консензуален претседател, до кој за жал, и покрај нашите обиди за преговори и дијалог не дојде, но ние нема да се откажеме од тоа, рече Ахмети.
На митингот што се одржа во спортската сала на училиштетото во Неготино меѓу другите зборуваа и кандидатите за пратеници во Шестата изборна единица Абдулаќим Адеми и Амет Алити.
