Осум пожари се активни низ Македонија до 8 часот, информира Центарот за управување со кризи.
Активен е пожарот во Националниот парк „Јасен“ и е зафатена висока букова шума. Во пожарот кај местото викано „Дуња“, гори сува трева и смрека. Таму Шумското стопанство „Караџица“ ја следи состојбата на терен. Сува трева и грмушки горат и во пожарот кај местото Добридолски Рупи во атар на село Патишка Река, кој се појави вчера и е се уште активен.
Активен е и пожарот кај село Ореше, во местото викано Орешко Петле. Тој се проширил кон повисокиот дел од планината кон местото Орешка Чука и кон Богомила и е активен во превец на прилепска територија. Зафатена е млада сеча, даб, бука и бор.
Активни се и пожарите на планината Кожуф на место Оков рид, општина Гевгелија, како и во реонот на село Добровени, општина Новаци, каде што гори трева, нискостеблеста и високостеблеста шума и се движи кон местото викано караула Мандич. На некои места гори и на територија на Грција. Пожарот кај место викано „Радуч“ на планина Јабланица е се уште активен и е проширен на територија на Албанија.
Пожарот кај село Вратница во општина Јегуновце е се уште активен и се шири кон атарот на село Беловиште.
Во гаснењето на пожарите учествуваат екипи на Дирекцијата за заштита и спасување, од подрачните шумски стопанства и од територијалните противпожарни единици. Од некои општини е побарана интервенција од авионите на ДЗС.
Вчера се ставени под контрола пожарите во месноста „Митрови Крсти“, во општина Гостивар и во атар на село Стенче во општина Брвеница. ЛОкализирани се и: пожарот во атарот на село Зајас, пожарот на планината Готен, кај местото викано „Папино“ (општина Василево) и пожарот во месноста Царевиќ, Дрен и Беловодица (општина Прилеп).