Технолошкиот милијардер Илон Маск, новоименуваниот шеф на кабинетот на Белата куќа, Стивен Милер, како и неколку големи компании, најверојатно ќе бидат предмет на конгресни истраги откако демократите во јануари ќе ја преземат контролата врз Конгресот, најавија високи претставници на Демократската партија.
Во телевизиско гостување, конгресменот Роберт Гарсија од Калифорнија и сенаторката Елизабет Ворен од Масачусетс, кои ќе ги предводат Комитетот за надзор во Претставничкиот дом и Комитетот за банкарство во Сенатот, најавија засилен надзор по убедливата победа на демократите на изборите за Конгресот.
Во меѓувреме, лидерот на демократите во Претставничкиот дом, Хаким Џефрис, навести дека тој и неговата партија ќе поддржат покренување постапка за импичмент на министерот за војна Пит Хегсет.
Гарсија, највисокиот претставник на демократите во Комитетот за надзор на Претставничкиот дом, рече дека истрагите ќе се фокусираат на вмешаноста на Маск во минатогодишното отпуштање вработени во рамките на Министерството за владина ефикасност, како и на улогата на Милер во строгата имиграциска политика на администрацијата на Доналд Трамп.
„Мислам дека постои голем интерес, не само во нашиот комитет, туку и во другите комитети во Конгресот, да разговараме со господинот Маск“, изјави Гарсија за Си-Ен-Ен.
Ворен најави дека и неколку компании треба да се подготват за конгресни истраги, но не посочи конкретни имиња.
„Ако остварувате профит мамејќи ги американските семејства и вашите инвеститори, подобро е да се подготвите за сериозни истраги“, рече Ворен.
Милер, кого Гарсија го нарече архитект на „ужасната и неправедна“ имиграциска политика, неодамна беше унапреден на функцијата шеф на кабинетот на Белата куќа.
„Стивен Милер е во центарот на најважните политички одлуки на оваа администрација и затоа заслужува да биде предмет на надзор и истрага“, изјави Гарсија.
Иако гласачите ги казнија републиканците на изборите за Конгресот, се очекува администрацијата на Трамп, со Милер на позицијата шеф на кабинетот, да продолжи со агресивниот пристап во спроведувањето на имиграциската политика, да ги поттикнува културните судири и да не попушта пред Конгресот под контрола на демократите, наведуваат функционери и аналитичари.
Џефрис, кој во јануари треба да стане претседател на Претставничкиот дом, во неделата изјави дека демократите ќе поддржат мерка за импичмент на Хегсет. Станува збор за конгресна постапка што може да доведе до негово отстранување од функцијата.