Судири меѓу демонстрантите и полицијата избувнаа денеска во центарот на Рим, откако учесниците на протестот се обидоа да продолжат кон зградите на државните институции, јави италијанската новинска агенција Анса.
Инцидентот се случи во близина на плоштадот Ларго ди Санта Сузана, кога демонстрантите почнаа да фрлаат шишиња кон припадниците на безбедносните сили.
Полицијата одговори со водени топови и солзавец, по што презема неколку интервенции за да ги потисне насобраните и да ги смири судирите.
Полицијата денеска во Рим приведе повеќе од 200 млади лица кои се обидоа да предизвикаат немири, пренесуваат италијанските медиуми.
Scontri vicino a Piazza della Repubblica, a Roma, tra manifestanti contro il carovita che volevano proseguire in corteo e la polizia che li ha bloccati con una carica e l’idrante. https://t.co/Si7HOxbcX9
— Local Team (@localteamit) October 24, 2026
Напнатоста ескалирала денеска попладне во близина на Колосеумот, кога неодобрена поворка насилно влезе во амфитеатарот, пренесува „Рома тудеј“.
Биле одобрени два протеста, меѓу кои и собирот под наслов „Одблокирајте сè“, организиран од десничарски студентски здруженија. Тој завршил без инциденти во населбата Прати.
Групата „Движење 17 октомври“, формирана по судирите во Милано минатиот викенд, преку апликации за допишување и социјалните мрежи најави три собири за денеска. Според најавите, групите требаше да се спојат на сè уште непозната крајна локација.
Поради тоа биле преземени засилени безбедносни мерки, во кои учествуваат повеќе од 1.500 припадници на безбедносните сили.
Roma, ahora. Sube la tensión. https://t.co/wAeSheFdkD
— Irene L. Savio (@Irenls_) October 24, 2026
Протест против војната и повторното вооружување на Европа
Во меѓувреме, одобрениот марш под наслов „Италија надвор од војната“ тргна од Плоштадот на Републиката во Рим.
Маршот, организиран од групата „Антиимперијалистичка оска“, собра околу стотина демонстранти.
Покрај знамињата на Палестина, Куба, Либан и Комунистичката партија на народното единство, можеа да се забележат и голем број италијански знамиња.
На плоштадот неколку стотици демонстранти извикуваа пароли против НАТО и повторното вооружување на Европа.
По завршувањето на маршот, се појавија други групи млади луѓе, кои внимателно ги следела полицијата распоредена низ целата област.
Една група потоа се одвоила и тргнала кон Колосеумот, обидувајќи се да стигне до Флавиевиот амфитеатар. Полицијата ги запрела со кордон, по што тие се вратиле на улицата Виа Кавур.
Сепак, подоцна успеале да влезат во Флавиевиот амфитеатар, но набргу излегле и се судриле со полицајците кои го контролирале излезот.
Рим денеска е под посебни безбедносни мерки, со повеќе од 1.500 полицајци распоредени низ градот со цел да се спречи повторување на судирите што се случија во Милано.
Девет лица уапсени, 87 пријавени во полиција за време на протестите
Во Италија, за време на денешните протести во повеќе провинции, биле уапсени девет лица, додека 87 биле пријавени во полиција. Вкупно 371 лице било приведено во полициски станици за проверки, меѓу кои 110 малолетници и 69 странски државјани, соопшти Одделот за јавна безбедност на италијанската полиција.
Според полициските податоци, за време на контролите биле идентификувани вкупно 4.292 лица, пренесува агенцијата Аднкронос.
Најмногу апсења биле регистрирани во Падова, каде што биле уапсени четири лица, додека четири лица биле пријавени во полиција.
Во Милано биле уапсени три лица, а 41 лице било пријавено во полиција. Во тој град 167 лица биле приведени за проверки, меѓу кои 56 малолетници и 43 странски државјани. Во рамки на контролите биле идентификувани 2.885 лица.