Руските средства во вредност од милијарди евра, замрзнати во Европа по почетокот на инвазијата врз Украина, треба да останат под европска контрола, изјави Фридрих Мерц. Ова доаѓа по медиумските извештаи дека Соединетите Држави можеби ќе побараат надзор над дел од овие средства.
„Станува збор за средства што се замрзнати во Европа и тие треба да останат замрзнати во Европа. Ова е наша работа и ние сме тие што одлучуваат за тоа“, рече Мерц во Брисел, во пресрет на самитот на Европската унија.
Во средата, весникот „Фајненшел тајмс“ (*Financial Times*), повикувајќи се на извори запознаени со ситуацијата, објави дека САД предложиле префрлање на дел од замрзнатите руски средства во посебен финансиски механизам под надзор на Вашингтон, со цел да се оживеат мировните преговори.
Според британскиот весник, европските претставници го отфрлиле предлогот, кој бил изнесен од американскиот специјален пратеник Стив Виткоф и Џаред Кушнер, зетот на претседателот Доналд Трамп.
Агенцијата „Ројтерс“ не можеше веднаш независно да ја потврди оваа информација.
Портпаролот на Кремљ, Дмитриј Песков, изјави дека Русија нема информации за наводниот американски предлог.
„Ова се прашања кои, според медиумските извештаи, се на дневен ред за разговори меѓу Американците и Европејците. Не знаеме до која мера овие извештаи се веродостојни“, им рече Песков на новинарите. Земјите од Европската унија имаат замрзнато околу 210 милијарди евра средства на руската централна банка, откако Москва ја започна инвазијата врз Украина во февруари 2022 година.
Од таа сума, приближно 185 милијарди евра се наоѓаат во белгискиот централен депозитар за хартии од вредност, „Еуроклир“ (*Euroclear*), чие седиште е во Брисел.
Некои европски земји се залагаат за користење на овие замрзнати руски средства со цел да ѝ се обезбеди финансиска помош на Украина.