Премиерот на Косово, Албин Курти, денеска на седница на Собранието на Косово изјави дека буџетот за 2027 година ќе ги обезбеди потребните финансиски средства за поддршка на четворица поранешни лидери на Ослободителната војска на Косово, против кои се водат судски постапки во Хаг.
Курти рече дека Владата формирала работна група за изработка и координација на стратегија за поддршка на поранешните лидери на ОВК, нагласувајќи дека целта е во овој процес да се вклучат државните институции и претставниците на политичките партии.
„Имаме рок до 31 октомври да го усвоиме буџетот за 2027 година на седница на Владата. Тоа ќе го направиме, а буџетот, се разбира, ќе ги опфати сите неопходни буџетски ставки за секоја област, вклучително и финансиска поддршка за четворицата поранешни лидери на Ослободителната војска на Косово“, рече Курти.
Тој наведе дека, пред да се утврдат финансиските трошоци, потребно е да се изработи стратегија и да се дефинираат конкретни механизми за дејствување.
„Прво доаѓаат идејата, визијата, механизмите и мерките, а дури потоа трошоците за нив, не може трошоците да дојдат пред механизмите и визијата“, рече Курти.
Според неговите зборови: „ОВК и Народноослободителната војна претставуваат заедничко наследство, а одговорноста за одбрана на вистината за нив ги надминува мандатите на владите и партиските разлики“.