Калифорнија и уште шест американски сојузни држави поднесоа тужба против администрацијата на претседателот Доналд Трамп, обвинувајќи ја дека незаконски задржува средства што Конгресот веќе ги одобрил. Станува збор за околу 810 милиони долари кои Белата куќа се обиде да ги поништи пред крајот на фискалната година.
Трамп минатата недела побара еднострано задржување на средствата одобрени од Конгресот за програми поврзани со имиграцијата, расните прашања и образованието.
Тужбата отвора нов правен спор околу границите на претседателските овластувања во однос на трошењето на јавните средства.
Одлуката на Трамп да побара задржување на средствата непосредно пред крајот на фискалната година, кога законодавците имаат малку време да реагираат, предизвика критики од двете партии. Критичарите ја оценија како обид за заобиколување на уставното овластување на Конгресот да одлучува за федералното трошење.
Тужбата, поднесена пред федерален окружен суд во Калифорнија и предводена од калифорнискиот јавен обвинител Роб Бонта, наведува дека одбивањето на администрацијата да ги потроши одобрените средства ја нарушува поделбата на власта и други уставни одредби.
„Продолжуваме да бидеме згрозени од очигледното непочитување што претседателот Трамп го покажува кон основната уставна рамка на нашата влада. Само затоа што претседателот не го сака одредената програма, не значи дека може да ги укине средствата за неа“, изјави Бонта.
Уставот му дава на Конгресот овластување да одлучува за трошењето на федералните средства. Белата куќа, пак, минатата недела соопшти дека програмите финансирани со тие средства поттикнуваат незаконска имиграција, расни тензии и непотребни стравови поврзани со животната средина.
Сојузните држави во тужбата тврдат дека обидите на администрацијата на Трамп да задржи федерални средства ги поткопуваат исклучивите овластувања на Конгресот над федералниот буџет.