Полицијата во 19 европски земји, спроведе претреси поради сомнение за голема измама поврзана со интернет-продажба на мобилни телефони. Според Европското обвинителство (EPPO), штетата се проценува на околу 300 милиони евра.
Криминални групи, според истрагата, продале повеќе од еден милион користени мобилни телефони кои биле огласувани и продавани како нови. Од саботата се извршени повеќе од 160 претреси, а во Австрија, Германија и Шпанија се уапсени седуммина осомничени, меѓу кои и двајца наводни организатори на криминалната мрежа.
Истрагата покажала сомнежи дека мобилните телефони биле составувани во Хонг Конг и Обединетите Арапски Емирати од користени делови. Потоа биле чистени, пакувани и испраќани во Холандија, од каде биле транспортирани до магацини во Германија.
Оттаму, уредите биле продавани преку интернет на потрошувачи во Европската Унија како нови. Се верува дека од 2018 година биле продадени повеќе од еден милион вакви уреди.
Осомничените се товарат и за даночна измама преку фиктивни компании во земји членки на ЕУ и во Швајцарија. Според EPPO, на овој начин бил избегнат ДДВ во износ од повеќе од 30 милиони евра, од кои најмалку 25 милиони евра во Германија.
Главен центар на операцијата била германската покраина Северна Рајна-Вестфалија. Во градот Крефелд бил претресен магацин во индустриска зона, каде според германската агенција ДПА биле пронајдени меѓу 10.000 и 15.000 мобилни телефони.
Во операцијата учествувале 1.770 даночни, царински и полициски истражители.
Претреси биле извршени во Германија, Австрија, Белгија, Бугарија, Хрватска, Кипар, Естонија, Финска, Италија, Латвија, Литванија, Луксембург, Полска, Португалија, Романија, Словачка, Шпанија, Швајцарија и Холандија.
Во Велика Британија бил испитан и еден сведок, а EPPO соопшти дека е запленета голема количина дигитални и физички докази.