Арина Сабаленка не успеа да ја сокрие фрустрацијата по поразот од Елена Рибакина во финалето на УС Опен, а набргу по мечот објасни зошто го скршила рекетот.
Белорусинката во Њујорк ја бркаше третата последователна титула, но Рибакина ја совлада со 6:4, 5:7, 6:2 и така, исто како и на Австралија опен на почетокот на годината, ѝ нанесе пораз во финалето на Гренд слем турнир.
Откако се поздрави со Рибакина, Сабаленка го фрли рекетот на теренот, а подоцна го скрши. Камерите го забележаа нејзиниот излив на бес.
Набргу потоа, таа му кажа на снимателот „да оди во е** се“ додека ја снимаше како седи со својот тим.
На прес-конференцијата објасни дека на тој начин сакала да ја исфрли насобраната агресија и разочарување.
„Навистина е тешко да ги контролирате емоциите кога ќе загубите финале на Гренд слем, особено кога сте ја бркале третата титула. Само сакав сето тоа да го оставам зад себе, бидејќи ако задржев сè во себе, таму на теренот или овде, немаше да можам ниту збор да изговорам или ќе се однесував на многу непријатен начин“, рече Сабаленка.
„Само сакав да ја исфрлам сета таа агресија и разочарување. Мислам дека луѓето често веруваат дека искуството ги прави ваквите работи полесни. Мислат дека, кога имате искуство и играте многу финалиња, сè станува полесно“, додаде таа.
Рибакина со победата ја освои првата титула на УС Опен, а од понеделник токму од Сабаленка ќе го преземе и првото место на ВТА-листата.