Словенечкиот кошаркар Лука Дончиќ бележи неверојатни статистички бројки на почетокот на новата сезона.
Лука Дончиќ во моментов веројатно е најдобриот кошаркар во светот, а неодамна се зборуваше и за неговиот старт на сезоната, во кој на првите седум натпревари имаше најдобра статистика во историјата.
Во изминатата ноќ ги предводеше Лос Анџелес Лејкерс до победа над Портланд со 124:118, постигнувајќи неверојатни 53 поени, пет скока и пет асистенции.
Во моментов просечно постигнува 40,1 поен по натпревар!
Суперѕвездата на Лос Анџелес Лејкерс повторно се запиша со златни букви во историјата на славната франшиза, станувајќи дури четвртиот кошаркар во историјата на клубот со четири последователни натпревари на кои постигнал по 40 поени.
Пред него тоа им успеало на Коби Брајант, Елџин Бејлор и Џорџ Мајкан.
Дончиќ има 361 поен на осум одиграни натпревари, од вкупно девет колку што одиграле Лејкерс (го пропушти натпреварот против Клиперс). Тоа е најдобриот учинок во модерната ера на кошарката и нешто што не било видено уште од Вилт Чемберлен во 1962 година.
Ова беше негов десетти натпревар во кариерата на кој постигнал најмалку 50 поени, а дури 62. натпревар со најмалку 40 поени, пет скока и пет асистенции. Со тоа ги надмина Вилт Чемберлен и Леброн Џејмс на вечната листа и се наоѓа на врвот заедно со Мајкл Џордан.
Дончиќ го изедначи и рекордот на Оскар Робертсон за најдолга серија натпревари на кои постигнал најмалку 35 поени, пет скока и пет асистенции. Серијата трае седум натпревари.
Лука во текот на оваа серија постигна и најмалку пет тројки на секој натпревар, со што стана првиот кошаркар во историјата на кој му успеало тоа.