Утре портпаролот на Владата на Република Северна Македонија, Марија Митева, генералниот директор на Државна лотарија, Александар Климовски и директорот на Авалон продукција, Бобан Милошески ќе одржат прес-конференција во Клубот на пратеници.
Прес конференцијата следува откако премиерот Христијан Мицкоски денеска во Штип одговарајќи на новинарско прашање во врска со сумата која е потрошена за организирање на настаните поврзани со одбележувањето на 35 годишнината од независноста на државата, истакна дека Буџетот и граѓаните сето ова ги чинело нула денари и сите активности биле организирани од општественo одговорни компании.
„Имам лоша вест за сите оние кои шпекулираа, негодуваа, клеветеа, пласираа лажни информации, а молчев. Не сакав да зборувам затоа што оставав сето тоа што претставуваше навистина посебен момент за градовите низ земјава да биде посебен момент и за граѓаните во тие градови. Имаше таков настан и тука, во Штип. Лошата вест е дека буџетот сите овие настани го чинат нула денари. И граѓаните и буџетот сите овие настани ги чинат нула денари“, рече Мицкоски.
Наспроти ова, од СДСМ изјавија, а истото го потврдија и дел од медиумите, е дека прославата била платена од Државна Лотарија, која е во сопственост на државата.
„Државната лотарија е државна. Парите на Државната лотарија се народни пари.Кога државна компанија плаќа од дивидендата за концерти и прослави на Владата – тоа се пари на граѓаните. Нема „нула денари“. Има префрлање на трошокот од еден џеб на државата во друг. Додека касата е празна, додека се задолжуваат милијарди, додека нема пари за плати, пензии и земјоделци – има пари за спектакли што се претставуваат како „бесплатни“. Мицкоски, граѓаните не се идиоти“, изјавија од СДСМ.