ДУИ реагира на спотот што Владата го објави по повод 35-годишнината од независноста на Македонија, оценувајќи дека во него недостасува претставувањето на Албанците и на настаните кои, според партијата, се значајни за развојот на државата.
Од ДУИ посочуваат дека спотот е на македонски јазик и дека во него се застапени македонски уметници, додека Албанците, според нив, се практично изоставени од приказната за трите и пол децении независност.
Партијата особено го проблематизира вклучувањето на Игор Дурловски во спотот, поврзувајќи го со настаните од 27 април 2017 година, кога беше извршен насилен упад во Собранието.
Од ДУИ велат дека во спотот не се споменати Охридскиот рамковен договор, членството на земјата во НАТО, како и Првата меѓувладина конференција со Европската Унија.
Според партијата, станува збор за клучни политички моменти кои влијаеле врз развојот на државата и нејзиното позиционирање во евроатлантските структури.
„35-годишнината од независноста требаше да биде момент да се покаже каква држава изградивме заедно и каде сакаме да ја однесеме. Владата избра да покаже нешто друго“, се наведува во реакцијата на ДУИ.
Од партијата оценуваат дека со ваквиот пристап се создава слика за држава во која Албанците се „невидливи“ и предупредуваат дека, како што велат, станува збор за „враќање назад кое не смее да се нормализира“.
ДУИ во реакцијата ја критикува и ВРЕДИ, со пораката: „Додека Вреди, едноставно, невреди!“