Претседателот на ФИФА, Џани Инфантино, доби едногласна поддршка од членовите на Советот на светската фудбалска организација, што се толкува како јасен сигнал дека тој ќе се обиде да обезбеди уште еден четиригодишен мандат.
По состанокот на Советот во Рабат, ФИФА соопшти дека нејзиното раководство целосно стои зад актуелниот претседател. Членовите на Советот ја потврдиле довербата во Инфантино, кој е избран од сите 211 национални фудбалски асоцијации членки на организацијата.
Инфантино, од своја страна, ја изразил поддршката за генералниот секретар Матијас Графстром и административниот тим, нагласувајќи ја нивната улога во спроведувањето на стратешките цели и планови на ФИФА.
Од организацијата порачаа и дека нема да толерираат активности кои би можеле да го нарушат нејзиниот углед или интегритет. Во случај на потреба, ФИФА најави преземање соодветни мерки за нивна заштита.
На состанокот било разговарано и за процесите на управување во организацијата. Од ФИФА посочија дека од неодамнешните случувања се извлечени важни поуки и дека во иднина ќе се работи на дополнително унапредување на процедурите и начинот на управување.
По состанокот во Рабат, Инфантино продолжи со своите јавни активности. Тој присуствуваше на натпреварот од Африканскиот куп на нации за жени меѓу Малави и Замбија, во кој Замбија славеше со 2:1.
Едногласната поддршка од Советот доаѓа во период кога се очекува да се разјаснат плановите за идното раководство на ФИФА, а позицијата на Инфантино во моментов изгледа значително зајакната.