ФИФА изрече казни за големиот инцидент што се случи по финалето на Светското првенство меѓу Шпанија и Аргентина, а најлошо помина Леандро Паредес.
Аргентинскиот играч за врска доби суспензија од дури 10 натпревари и парична казна од 90.000 долари поради неговата улога во хаосот што настана по последниот свиреж во Њу Џерси.
Паредес беше еден од главните актери во конфликтот. Аргентинецот го нападна шпанскиот репрезентативец Гави и го собори на теренот, по што ситуацијата на теренот речиси целосно излезе од контрола.
Поради сето ова, ФИФА одлучи да го казни со една од најстрогите суспензии што може да ги добие играч од национален тим – забрана за настап за репрезентацијата на 10 натпревари.
Нахуел Молина исто така доби парична казна од 90.000 долари и ќе пропушти седум натпревари.
Тиаго Алмада доби суспензија од еден натпревар и парична казна од 30.000 долари, додека членот на стручниот штаб на Аргентина, Роберто Ајала, доби суспензија од три натпревари и иста таква парична казна.
Гави, од друга страна, доби забрана за еден натпревар и парична казна од 30.000 долари.
Сепак, токму во казната на Паредес се крие детал што би можел да предизвика гнев кај многумина кон ФИФА.
Во официјалното соопштение на ФИФА се наведува дека суспензиите, во согласност со член 69 од Дисциплинскиот правилник, „се пренесуваат на следните натпревари на соодветните национални тимови“.
ФИФА не наведе дека Паредес мора да ги пропушти следните 10 натпревари на Аргентина од официјални натпреварувања. Казната се пренесува на следните 10 натпревари на репрезентацијата.
Тоа значи дека пријателските натпревари би можеле да се искористат за одработување на суспензијата.
По Светското првенство, Аргентина нема квалификациски натпревари за следното Светско првенство, па во претстојниот период ќе одигра голем број пријателски натпревари. Доколку репрезентацијата одигра 10 такви натпревари пред Паредес да добие нова шанса за настап на важен официјален натпревар, неговата казна би можела целосно да се одработи преку пријателските средби.
Теоретски, сценариото е многу едноставно.