Левица ќе поднесе втора интерпелација против министерот за внатрешни работи Панче Тошковски, обвинувајќи го за саботирање истраги, селективна правда, непрофесионално работење на полицијата и судир на интереси. Претседателот на партијата, Димитар Апасиев, на денешната прес-конференција изјави дека состојбата во МВР дополнително се влошила, а институцијата наместо професионален сервис, станала „приватна партиска полиција“.
„Сметаме дека оваа година проблемите во МВР не само што не се решија, туку и се наталожија. Како држава која е над европскиот просек по бројот на полицајци по глава на жител, сметаме дека перформансите кои ги покажува и министерот и полицијата се неприфатливи за едно демократско општество“, рече Апасиев.
Тој посочи дека интерпелацијата е поделена во 17 точки, групирани во шест области, а меѓу главните обвинувања се саботирање на истраги и несоработка со Обвинителството за организиран криминал и корупција.
„Алудираме на несоработката во случајот со шпионажа кај највисокиот државен врв, непостапување за откривање криминал со надзорот во Бехтел и Енка, како и непостапување кај дивоградбите во Чаир“, изјави лидерот на Левица.
Апасиев ја обвини полицијата и за селективно постапување и политички мотивирани одлуки, посочувајќи го случајот со Артан Груби, како и прекинатата постапка за увозот на канцероген мазут.
„Третата глава се однесува на креирање приватна партиска полиција или познатата ‘ВМР-МВР’ од прислушуваните разговори“, рече тој, додавајќи дека во интерпелацијата се опфатени и полициските пропусти поврзани со трагедијата во Кочани.
Во делот за непостапување при насилство и говор на омраза, Апасиев ги спомена случаите со семејно насилство, фемицид и врсничко насилство во училиштата.
„Имаме еклатантни прекршувања од страна на полицијата во повеќе случаи, вклучително и непроцесуирање на повици за силување и сексистички коментари“, изјави тој.
Лидерот на Левица обвини и за двојни стандарди во полициското постапување.
„Алудираме на приведувањето поради истакнување палестинско знаме на спортски натпревар, а неприведување при палење македонско знаме и свиркање на македонската химна“, рече Апасиев.
Во последниот дел од интерпелацијата, како што посочи, се отвора прашањето за судир на интереси и сомнителни тендери поврзани со министерот Тошковски.
„Министерот ќе треба да одговори за адвокатско-тужбените шеми кои ги имал пред да стане министер, како и за сомнителните тендери и фантом фирми“, изјави Апасиев.
Тој најави дека интерпелацијата ќе биде поднесена веднаш по прес-конференцијата и дека сите точки детално ќе бидат образложени пред пратениците.