Владата денеска ја најави програмата за одбележување на 35 години од независноста на Македонија, а централниот настан ќе биде концерт на светски познатиот диџеј Дејвид Гета на 8 септември во Арената „Тодор Проески“ во Скопје.
Портпаролката на Владата, Марија Митева, на прес-конференција со „Авалон продукција“ истакна дека јубилејот нема да биде одбележан со само еден настан, туку со национална културна манифестација од највисок ранг, која ќе трае од јули до септември и ќе се реализира во повеќе градови низ државата.
„Нашата цел е ова одбележување да има државничка тежина, современ културен и продукциски пристап, но и меѓународна препознатливост. Сакаме да создадеме концепт што ќе ја претстави Македонија како држава што знае достоинствено да го одбележи сопствениот пат и да ја покаже сопствената културна самодоверба пред домашната и меѓународната јавност“, рече Митева.
Таа нагласи дека концептот предвидува децентрализација и вклученост на повеќе градови, со цел културата да стигне до што повеќе граѓани преку различни форми на уметнички израз.
Од „Авалон продукција“ соопштија дека влезот за концертот на Дејвид Гета ќе биде бесплатен, но со претходна регистрација која ќе чини симболични 35 денари по лице – бројка што директно асоцира на 35-годишнината од независноста.
Секој корисник ќе може да резервира најмногу две влезници, а регистрацијата ќе биде отворена и за посетители од странство.
Од продукцијата посочија дека настанот се очекува да привлече публика од целиот регион и да има значаен ефект врз туризмот, угостителството и промоцијата на Македонија како дестинација за големи меѓународни музички и културни случувања.
Дополнителни информации за начинот на регистрација ќе бидат објавени утре.