Две лица се убиени, а уште две се ранети откако малолетник отвори оган во училиште во северозападен Бразил, соопштија денес локалните власти.
Нападот се случил во градот Рио Бранко, каде што полицијата привела 13-годишен ученик осомничен за пукањето.
Според властите, меѓу повредените е и 11-годишно девојче, кое претрпело прострелна рана во ногата и е однесено во болница, објави порталот „Диарио Либре“.
Претставник на воената полиција на државата Акра изјави дека напаѓачот испукал неколку куршуми во училишниот ходник, во областа што води кон администрацијата, и дека по нападот решил самиот да се предаде.
Полицијата го привела и очувот на осомничениот, сопственикот на пиштолот калибар .380 што се користел во нападот, додека идентификувани се и други ученици за кои се сомнева дека однапред знаеле за планираниот напад и дека евентуално учествувале во неговата подготовка.
Очевидци велат дека учениците се обиделе да избегаат од зградата во паника. Еден од нив успеал да скокне преку висок ѕид и да се засолни во блиската зграда, додека другите останале на покривот на училиштето обидувајќи се да избегаат.
Властите започнале истрага за да ги утврдат мотивите за нападот и сите околности околу инцидентот.