Рускиот министер за надворешни работи Сергеј Лавров денеска на седницата на Советот на Федерацијата зборуваше за контактите со Соединетите Американски Држави во врска со мирно решавање на конфликтот во Украина, обвинувајќи ја Европската Унија дека се обидува да го спречи тој процес, пренесува руската агенција РИА Новости.
Лавров потврди дека Москва и Вашингтон постигнале договор за продолжување на работата за завршување на украинскиот конфликт. „Главната работа е да постои принципиелно разбирање дека одржливо решение не е можно без елиминирање на корените на кризата“, рече шефот на руската дипломатија.
Тој изјави дека предлозите што ги донесе во Москва специјалниот претставник на американскиот претседател, Стив Виткоф, зборуваат за потребата од обезбедување права на националните малцинства и верските слободи во Украина. Русија, додаде тој, ги цени напорите на Доналд Трамп за решавање на конфликтот преку политички и дипломатски средства.
Од друга страна, Лавров остро ја критикуваше политиката на Европската Унија, тврдејќи дека Брисел е „заведен од илузии“ дека Русија може да биде поразена.
„Откако го инвестираа целиот свој политички капитал во војна со Русија со рацете и телата на украинските граѓани, тие се залажуваат себеси во безнадежна политичка слепило со илузијата дека некако ќе ја победат нашата земја. Како што нагласи претседателот, ние немаме намера да се бориме со Европа, немаме такви мисли“, рече Лавров.
Но, тој веднаш предупреди дека Москва ќе одговори на какви било непријателски чекори, вклучително и евентуално распоредување на европски воени контингенти во Украина и запленување на руски имот.
„Ќе одговориме на какви било непријателски чекори, вклучително и распоредување на европски воени контингенти во Украина и запленување на руски имот. И веќе сме подготвени за овој одговор“, рече Лавров.
Според него, Брисел вештачки го попречува процесот на дипломатско решение, за кое, тврди тој, зборувал и Трамп.
„Европа се обидува на секој начин да го охрабри таканаречениот украински лидер, членовите на неговиот режим, да не престанат да се борат до последниот Украинец. Сега оваа идеолошка тензија е под влијание на финансиски размислувања, бидејќи освен ограбувањето на Русија и конфискацијата на нашите резерви на злато и девизи, кршејќи ги нормите на меѓународното и трговското право, тие немаат други извори на финансирање“, заклучи тој.
Изјавите на рускиот шеф на дипломатијата, Сергеј Лавров, доаѓаат во време на интензивна дипломатска активност. Минатата недела, рускиот претседател Владимир Путин се сретна во Кремљ со специјалниот претставник на американскиот претседател, Стивен Виткоф, и зетот на Трамп, Џаред Кушнер. Тие разговараа речиси пет часа за американската мировна иницијатива, но сè уште не е постигнато компромисно решение. Путин подоцна изјави дека Вашингтон го поделил планот од 27 точки на четири пакети и дека Москва не се согласува со некои од нив.
Во меѓувреме, украинскиот претседател Володимир Зеленски во понеделник отпатува во Велика Британија, каде што разговараше за американскиот предлог со британскиот премиер Кир Стармер, францускиот претседател Емануел Макрон и германскиот канцелар Фридрих Мерц. Украинските медиуми објавија дека по состанокот тој повторно одбил какви било територијални отстапки. Зеленски, исто така, објави дека планира денес да достави амандмани на нивната мировна иницијатива до Соединетите Држави.