Европската индустрија е во борба за „живот или смрт“, изјави францускиот претседател Емануел Макрон, оценувајќи дека континентот е притиснат помеѓу конкурентна Кина и протекционистички САД, и дека затоа Пекинг треба да помогне со поголеми инвестиции во Европа.
– Кинезите мора да го направат во Европа она што Европејците го направија пред 25 години инвестирајќи во Кина – рече Макрон во интервју за францускиот весник „Еко“ по враќањето од неговата четврта официјална посета на Пекинг.
Трговскиот дефицит на ЕУ со Кина изнесува 306 милијарди евра во 2024 година, со европски извоз од 213 милијарди и увоз од 519 милијарди евра, објавува бриселскиот „Политико“.
– Се обидувам да ѝ објаснам на кинеската страна дека нивниот вишок е неодржлив и дека на овој начин „ги убиваат сопствените клиенти“, првенствено затоа што веќе не увезуваат речиси ништо од нас – рече Макрон.
Слична нерамнотежа, според „Политико“, постои и кај инвестициите – европските акумулирани инвестиции во Кина изнесуваа 232 милијарди евра, додека кинеските инвестиции во Европа достигнаа 65 милијарди, според податоците за 2023 година.
– Свесни сме дека тие се исклучително напредни во одредени области, но не можеме постојано да увезуваме. Кинеските компании треба да дојдат во Европа, како што EDF и Airbus одеа во Кина, и да создаваат вредност и можности за Европа, рече францускиот претседател.
Сепак, тој додаде дека ваквите инвестиции „не смеат да бидат предаторски, насочени кон хегемонија и создавање зависност“.
Макрон предупреди дека ако трендовите не се променат, Европа би можела да биде принудена да воведе царини за кинескиот увоз, слични на мерките што ги воведоа САД.
Тој, исто така, го обвини Пекинг дека „удри во сржта на европскиот модел на иновации и индустрија“.
Сепак, наместо понатамошна ескалација, Макрон предлага „примирје“ во економските односи, или „заемно укинување на агресивните политики, како што се ограничувањата за извоз на европски машини за производство на полупроводници и кинеските ограничувања за извоз на ретки метали“.