Јосип Оршуш (40), кој во четвртокот застрела две жени во Хрватска, убивајќи една од нив, е уапсен во Словенија, соопшти тамошната полиција.
Полициската управа – Меѓумурје доби информации од словенечките колеги дека Оршуш е пронајден и уапсен во областа Бистрица. Апсењето е извршено врз основа на европска потерница, а осомничениот ќе биде предаден на полициските службеници на Меѓумурската жупанија.
Според словенечките медиуми, Оршуш е уапсен во општина Чреншовци, а при апсењето тој имаше со себе пушка, пиштол и нож.
Сепак, велат дека не се спротивстави на апсењето.
Тој моментно е под надзор во Полициската управа – Мурска Собота. Граѓаните го препознаа врз основа на фотографија и пријавија во полиција.
Против Оршуш претходно е поднесена кривична пријава до Окружното државно обвинителство во Вараждин поради сомнение дека изврши тешко убиство на една жена (28) и обид за тешко убиство на друга (29).