Американскиот синџир за брза храна „Мекдоналдс“ регистрираше седум трговски марки во Русија кои ги опфаќаат неговите добро познати производи и услуги, според податоците од организацијата „Роспатент“.
Брендовите „Биг Мек“, „Биг Тасти“, „Ројал Чизбургер“, „Квартер Паундер“, „МекФреш“, „МекФлури“ и „МекДеливери“ се регистрирани, пренесува ТАСС.
Сите апликации беа поднесени од Соединетите Американски Држави во декември 2024 година, а одлуката за регистрација беше донесена во текот на оваа година. Регистрациите истекуваат во 2034 година.
„Мекдоналдс“ го напушти рускиот пазар во пролетта 2022 година, по почетокот на конфликтот во Украина и воведувањето на западните санкции против Москва.
Потоа сите ресторани беа затворени, а во мај истата година компанијата објави дека целосно ја напушта Русија.
Руските активи на „Мекдоналдс“ ги купи бизнисменот Александар Говор, кој во јуни 2022 година отвори ресторани за брза храна под новиот бренд „Вкусно и точка“.