Супертајфунот Рагаса, најмоќниот тропски циклон во светот оваа година, го погоди Хонг Конг со ветрови со сила на ураган и поројни дождови, додека обилните дождови во кинескиот регион Тајван „оставија“ 14 жртви и 124 исчезнати.
Езерото „Матаиан Крик“ во источниот округ Хуалиен, Тајван, се прелеа и ја зафатија општината Гуангфу во округот Хуалиен, каде што е регистриран најголем број смртни случаи, соопштија локалните власти, објави Ројтерс.
Во Хонг Конг, огромни бранови поплавија некои блиски патишта и станбени згради, а хотелите лоцирани во близина на брегот се меѓу поплавените имоти. Поплавите, исто така, ги погодија оддалечените кинески острови во близина на Хонг Конг, вклучувајќи го и Лантау, каде што се наоѓа меѓународниот аеродром на градот.
Тајфунот Рагаса, со ветрови до 200 километри на час, се очекува да го погоди Хонг Конг во текот на денот, со епицентар на околу 100 километри јужно од густо населената територија, и се очекува да го задржи интензитетот додека се движи кон брегот на кинеската покраина Гуангдонг, дом на повеќе од 125 милиони луѓе, каде што се очекува да стигне до копното околу пладне по локално време.
Хонг Конг издаде предупредување за тајфун од ниво 10, највисоко ниво на предупредување. Властите предупредија за зголемување на нивото на морето и отворија 49 привремени засолништа. Предупредување од ниво 10 беше издадено и во Макао, а во Гуангдонг, властите евакуираа повеќе од 770.000 луѓе, соопшти државниот радиодифузер CCTV.
Крајбрежната стража на Филипините соопшти дека четири тела се извлечени од превртен рибарски брод покрај брегот на покраината Кагајан, а шестмина преживеани се спасени, додека потрагата по уште тројца кои сè уште се водат како исчезнати е во тек.
Филипинската национална полиција соопшти дека 67-годишен маж е пронајден мртов покрај брегот на градот Агу во покраината Ла Унион, откако бил пријавен како исчезнат откако паднал во река за време на бурата. Во покраината Бенгет, која нема излез на море, 74-годишен маж почина откако лизгање на земјиштето го однесе неговото возило по автопат во градот Туба, при што беа повредени неколку патници во други автомобили.
Тајфунот Рагаса, наречен „крал на бурите“ од метеоролозите, стигна до копното на Филипините со силни ветрови и дожд, предизвикувајќи поплави во многу делови од северен Лузон, каде што многу патишта станаа непроодни поради поплавите. Националниот совет за намалување и управување со ризици од катастрофи доцна синоќа соопшти дека Рагаса и југозападниот монсун погодиле околу 192.000 луѓе во 950 села низ целата земја. Тајфунот Рагаса вчера ја напушти областа околу Филипините, но властите во земјата внимателно го следат новото временско нарушување – тропската бура Буалој, за која се очекува да се зајакне во силна тропска бура до утре вечер.