Меѓународната фудбалска федерација (ФИФА) казни шест фудбалски асоцијации со парична казна од 20.000 до 26.500 швајцарски франци поради дискриминаторско однесување на квалификациските натпревари за Светското првенство во март.
ФИФА ги казни фудбалските асоцијации на Албанија, Еквадор, Парагвај, Романија, Босна и Херцеговина и Индонезија, но не прецизираше точно за какви форми на дискриминација станува збор.
Албанската федерација ќе мора да го намали капацитетот на стадионот за 20 проценти или да го пополни тој дел од трибините со „заедници и/или групи со посебни интереси“. Следниот домашен натпревар на Албанија ќе биде против Србија на 7 јуни.
Слична казна му беше изречена и на Еквадор, кој е домаќин на Бразил на 5 јуни, а федерацијата ќе мора да го намали капацитетот на својот стадион за 25 проценти или да го пополни тој дел со групи од заедницата.
Фудбалските асоцијации на Парагвај, Романија, Босна и Херцеговина и Индонезија исто така се казнети со намален капацитет за нивните следни домашни натпревари во квалификациите за Светското првенство.
Квалификациите за Светското првенство во 2026 година, чии заеднички домаќини ќе бидат САД, Канада и Мексико, ќе продолжат за две недели.