Поранешниот премиер на Велика Британија Тони Блер денеска попладне пристигна во Скопје.
Во ВИП одделот на скопскиот аеродром, го пречека шефот на дипломатијата, Никола Попоски и британскиот амбасадор Кристофер Ивон.
Веднаш по слетувањето Блер замина на средба во Владата со премиерот Никола Груевски, пренесе Утрински Весник.
Според протоколот планирано е да се сретне и со претседателот Ѓорге Иванов, по што беше најавено е негово учество и обраќање на Сахара балканскиот мировен фестивал во новиот театар. Блер денеска доцна попладне треба заедно со премиерот Никола Груевски и со индискиот бизнисмен Субрата Рој да одржат говори на мировната конференција.
Според информациите на лондонски Телеграф со просечно околу 7.100 евра по минута, Блер, е најскапиот говорник во светот.
Сепак, од организацијата на Сахара груп, организаторите на фестивалот, убедуваат дека за овој говор Блер нема да добие пари, бидејќи тој доаѓал во Скопје поради почитта и личното пријателство со Субрата Рој.