Учесниците на маршот на Белградскиот прајд се упатија кон Владата на Србија, а потоа кон Собранието, барајќи општеството и државата да не ги дискриминираат поради нивната сексуална ориентација.
Директорот на белградскиот Прајд Горан Милетиќ пред почетокот на Прошетката на гордоста изјави дека оваа година на пунктовите поминале значително поголем број луѓе од претходните години, поради што се прошетката има најмногу учесници досега.
Милетиќ пред новинарите изјави дека барањата се исти како и претходните години, а меѓу главните се реакцијата на институциите на дискриминација и насилството врз ЛГБТ популацијата, како и донесувањето на Законот за истополови партнерства.
Тој изјави дека денешната прошетка на гордоста ја поддржале четворица министри во Владата на Србија, комесарот за заштита на еднаквоста, народниот правобранител, повеќе амбасадори и претседатели на политички партии.
Присутни се министерката за евроинтеграции Тања Мишчевиќ, министерката за наука Јелена Беговиќ, министерот за човекови и малцински права и социјален дијалог Томислав Жигманов и министерката без ресор Татјана Мацура.
Жигманов пред новинарите изјави дека министерството на чело со него го подготвило предлогот за Законот за истополови заедници, а дали ќе биде усвоен, останува на Собранието да одлучи. Тој оцени дека правата на ЛГБТ лицата треба да бидат законски регулирани и дека државата и општеството во Србија треба да работат на спречување на дискриминацијата на дневна основа, вклучително и со усвојување на тој закон.
Мишчевиќ рече дека се разговара за законот, додавајќи дека се работи за заштита на правата на одреден број граѓани кои треба да ги имаат истите права како и другите граѓани. Јасната порака на денешната средба е дека правото на секој поединец во државата е свето, рече министерката.
Кумата на Прајд, пејачката Зејна Муркиќ изјави дека и е чест да биде кума на настанот. Денешната прошетка на гордоста таа ја оцени како голем марш, наведувајќи дека се надева дека ќе ги донесе промените што ги бара прошетката. Таа истакна дека се надева дека ова е последна година со овие барања.
Комесарката за заштита на еднаквоста Бранкица Јанковиќ пред почетокот на денешната прошетка на гордоста истакна дека најголем број претставки до таа институција доаѓаат токму поради дискриминација врз основа на сексуална ориентација, но дека најголем број се поднесени од граѓанските организации.
„Би сакале да доаѓаат повеќе поплаки од поединци, бидејќи тие зборуваат со нас за дискриминација, но кога треба да поднесат жалба, се откажуваат бидејќи се плашат да не ги суди околината“, рече комесарката.
Заменик амбасадорот на САД во Србија Александар Титоло изјави дека денешниот собир е од големо значење, наведувајќи дека ЛГБТ популацијата 50 години ги ужива своите права во Америка.
Како што изјави тој, денеска дошол да види како изгледа парадата во Белград и се надева дека ЛГБТ заедницата во Србија ќе ги има правата што ги бара со денешната прошетка.