Човекот кој пукал во американскиот кандидат за претседател Доналд Трамп, испукал повеќе куршуми од „повисока позиција“ надвор од собирот, пред персоналот на американската тајна служба да го „неутрализира“ пукачот, соопшти Агенцијата за спроведување на законот.
„За време на предизборниот митинг на поранешниот претседател Трамп во Батлер, Пенсилванија, вечерта на 13 јули околу 18:15 часот, осомничениот испукал повеќе истрели кон бината од подигната позиција надвор од местото на собирот“, се вели во соопштението на Тајната служба.
Персоналот на тајната служба „го неутрализиралa пукачот, кој сега е починат“, се додава во соопштението.
„Тајната служба брзо одговори со заштитни мерки и поранешниот претседател Трамп е безбеден. Еден од присутните загина, а двајца се тешко повредени. Овој инцидент во моментов е под истрага и Тајната служба го известила ФБИ“, изјави Ентони Гуглиелми, шеф за комуникации на Тајната служба.
Има силно полициско присуство надвор од местото на митингот каде што се случи пукањето во Батлер, Пенсилванија, според известувањето од тимовите на Си-Ен-Ен на терен.
Целата зграда лоцирана лево од местото е опколена со десетина полициски автомобили, од кои некои се државни војници, а други се дел од канцеларијата на шерифот на округот Батлер.
Надвор од зградата има најмалку едно амбулантно возило.
Поранешниот претседател Доналд Трамп за Truth Social изјавил дека бил застрелан и погоден со куршум во „горниот дел од десното уво“.
Тој во изјавата вели дека „веднаш знаел дека нешто не е во ред со тоа што слушнал свирење, истрели и веднаш почувствувал како куршумот му ја скинал кожата.
„Сакам да им се заблагодарам на Тајната служба на Соединетите Американски Држави и на сите органи за спроведување на законот за нивната брза реакција на пукањето што се случи во Батлер, Пенсилванија. Што е најважно, сакам да изразам сочувство до семејството на убиениот на митингот, како и до семејството на уште едно лице кое беше тешко повредено. Неверојатно е дека таков чин може да се случи во нашата земја. Засега не се знае ништо за пукачот, кој сега е мртов. Бев застрелан со куршум кој го прободе горниот дел од десното уво. Веднаш знаев дека нешто не е во ред со тоа што слушнав свирење, истрели и веднаш почувствував како куршумот ми ја скина низ кожата. Имаше многу крварење, па тогаш сфатив што се случува. БОГ ДА ЈА БЛАГОСЛОВИ АМЕРИКА!“, гласи изјавата на Трамп.
Случајот се води како „обид за атентат“.